გიორგი ერისთავის პიესა ,,ძუნწი“

11 აპრილს,  სსიპ ქალაქ ქუთაისის N36 საჯარო სკოლის სააქტო დარბაზში, მოსწავლეთა და მშობელთათვის,   ერემია სვანაძის სახელობის დამოუკიდებელმა დასმა წარმოადგინა გიორგი ერისთავის პიესა,,ძუნწი“. როგორც მსახიობებმა აღნიშნეს, დაძაბულობით, შინაგანი ტკივილნარევი ნერვიულობით წარსდგნენ მაყურებლის წინაშე, მაგრამ მიუხედავად მღელვარებისა ღირსეულად და ამაყად წარმოადგინეს თავიანთი ნამუშევარი მაყურებლის წინაშე! დამდგმელი რეჟისორი, მხატვარი და მუსიკალური გაფორმება ეკუთვნის ვახტანგ ამანათიძეს. მონაწილეობენ: ალექსანდრე ლომთაძე, ბელა დათიაშვილი, გიორგი ჭაფოძე, თეკლა ხუჭუა, ზაზა იოსებაშვილი, ზურაბ კუპრაშვილი.

პოეტსა და დრამატურგს, გიორგი ერისთავს, განსაკუთრებული წვლილი მიუძღვის ქართული თეატრის განვითარებაში. 1850 წელს სწორედ გიორგი ერისთავი ედგა სათავეში პროფესიული ქართული თეატრის შექმნას, რომელსაც ის უშუალოდ ხელმძღვანელობდა 1850-1856 წლებში. მან ჩაუყარა საფუძველი ქართულ თეატრსა და დრამატურგიაში კრიტიკული რეალიზმისა და კომედიოგრაფიის განვითარებას. ერისთავმა დააარსა პირველი ქართული ლიტერატურული ჟურნალი „ცისკარი“ და, რაც მთავარია, ქართულ დრამატურგიას დაუტოვა ისეთი უკვდავი პიესები, როგორებიცაა: „გაყრა“, „დავა“, „ძუნწი“ და გადმოქართულებული პიესა „უჩინმაჩინის ქუდი“.

გამართულმა სპექტაკლმა მაყურებლის დიდი მოწონება დაიმსახურა. ბატონი ერემია სვანაძის სახელობის დასს დავულოცავთ პირველ ნაბიჯებს და სკოლის სახელით ვუსურვებთ ულევ წარმატებას.